სადაზღვევო კომპანია "ჯიპიაი ჰოლდინგ“

პანდემიის შემდეგ „ჯიპიაი ჰოლდინგისთვის“ დიდი გამოწვევა გახდა ქოლცენტრის გამართულად ფუნქციონირება. პრობლემის გადასაჭრელად საჭირო იყო ძირეული ცვლილებები, მუშაობის პროცესის გაუმჯობესება, კადრების გადინების შემცირება და, რაც მთავარია, მომხმარებლის კმაყოფილების გაზრდა.

• „ჯიპიაი ჰოლდინგს“ 200 000-ზე მეტი დაზღვეული ჰყავს.
• ერთწლიანი კვლევების შემდეგ კომპანიამ გაანალიზა ყველა წუხილი, პრობლემა და შენიშვნა, რაც დაზღვეულებს ჰქონდათ და გადაწყვიტა განსხვავებული მიდგომა აერჩია. 2023 წელს, სტანდარტული ქოლცენტრის ნაცვლად, „მომსახურების მხარდამჭერთა გუნდი“ შექმნა ზრუნვისა და ემპათიის ელემენტებით. შემუშავდა სატრენინგო მოდული.
• ქოლცენტრი გაიყო ორ ნაწილად: სამედიცინო და არასამედიცინო მიმართულებებად, გასამმაგდა თანამშრომლების რაოდენობა.

დღეს, როდესაც მომხმარებელი რეკავს მხარდაჭერის გუნდთან ე.წ. ცხელ ხაზზე, მხარდამჭერთა გუნდის მენეჯერი, რომელსაც ის უკავშირდება, საქმეზე სრულ პასუხისმგებლობას იღებს, არის დაზღვეულის გვერდით, შემთხვევიდან ანაზღაურებამდე ან სრული სერვისის მიღებამდე, პირველივე ზარიდან არის ჩართული საკითხების მოგვარებაში და საჭიროების შემთხვევაში, ადგილზეც გადის, რათა დაეხმაროს დაზღვეულს. მაგალითად, თუ საქმე გადაუდებელ სამედიცინო სერვისს შეეხება, მხარდაჭერის მენეჯერი შესაძლოა კლინიკაში პირადად მივიდეს და დაზღვევასთან დაკავშირებული ყველა საკითხი თავად მოაგვაროს კლინიკის ადმინისტრაციასთან. მსხვილი ავტოსაგზაო შემთხვევის დროს კი ადგილზე ავტოექსპერტი გადის. ამით მომსახურების პროცესი სადაზღვევო კომპანიასთან პირველი კომუნიკაციიდან ანაზღაურების ეტაპამდე, სრულად ტრანსფორმირდა. ახალი სისტემის წყალობით, ზარებზე რეაგირების მაჩვენებელი საგრძნობლად გაუმჯობესდა. მხარდაჭერის ჯგუფის ამუშავების შემდეგ იზრდება დისტანციური სქემებით მოსარგებლე დაზღვეულების რაოდენობა.

ქოლცენტრის ტრანსფორმაციის პროექტის განსახორციელებლად 2023 წელს 950 000 ლარი დაიხარჯა. მარკეტინგულ აქტივობებში - დამატებით 200 000 ლარი.

კომპანიაში კარგად ესმით, რომ კეთილსინდისიერი და ეთიკური დამოკიდებულება მომხმარებლების და დაინტერესებული მხარეების მიმართ ბიზნესის წარმატების მთავარი წინაპირობაა. ვებგვერდზე ყოველწლიურად ქვეყნდება კომპანიის როგორც ფინანსური, ისე არაფინანსური ანგარიშგება, ტარდება კვლევები პროდუქტების გასაუმჯობესებლად. 2024 წლიდან მომხმარებელი სრულიად ახალი აპლიკაციით ისარგებლებს და კიდევ უფრო გაიმარტივებს დაზღვევის მოხმარებას.

წელს უკვე მუშავდება ახალი ლოიალობის პლატფორმა, რომელიც დაზღვეულებს სხვადასხვა სარგებლის მიღების საშუალებას მისცემს.